Næturgisting fyrir látna

Fyrir rétt ári borgaði ég um 30.000 fyrir tvo sólarhringa þar sem lík af látnum ættingja var í geymslu, áður en hægt var að flytja það  í heimabyggð mína í líkgeymslu  þar sem er frítt að dvelja.  Það er mikill peningur og fólk áttar sig ekki á þessu eða öðrum kostnaði sem fylgir útför. Fólk er með hugann við að syrgja og er ekki að hugsa um kostnað á þessum tíma. Annað dæmi er að hvítir sokkar frotte  kosta um 3000 krónur á útfarastofu og það virðist allt vera í topp verði. Persónulega finnst mér vinalegt að jarðsetja fólk í sínum fötum en þetta er smekksatriði hjá hverjum og einum. En samt umhugsunarvert að spá í þennan kostnað.  Síðan setur fólk tilkynningar í útvarp og blöð, nú þegar t.d. Fréttablaðið er líka farið að birta dánartilkynningar þá finnst fólki að það þurfi að setja bæði í Morgunblaðið og Fréttablaðið þetta er kostnaður um 70.000 plús kostnaður við að setja tilkynningu í útvarp.  Síðan eru það blómaskreytingar og allt telur. Mér finnst fallegast að hafa fána á kistu frekar en blómaskreytingu því svo eru kransar til hliðar og aðrar skreytingar. Það er að mörgu að gæta og mætti alveg taka kostnað við útför til skoðunar, veit um fólk sem hreinlega hefur ekki haft efni á að láta jarða ættingja sína en þetta er víst eitt af því sem þarf að gera og ekki hjá komist. En er ekki óþarfi að okra á syrgjendum?

Líkhúsdvölin á við nótt á hóteli

Athugasemdir

[Billi bilaði, 24.7.2008 kl. 09:12]

Frá því í febrúar og fram í ágúst 2007 næstum því tvöfaldaðist verðið á útfararauglýsingum í Fréttablaðinu. Maður nennir ekki að vera með uppsteyt því það er um nóg annað að hugsa á svona tímum, en mér var dálítið hverft við.  (Verðið fór úr því að vera umtalsvert lægra en hjá Mogganum yfir í það að verða hærra. Kannski þeir hafi talið sig vera að vinna svona mikið á Mogganum að þeim þótti þetta við hæfi?)

[Snjólaug A. Sigurfinnsdóttir, 24.7.2008 kl. 12:52]

Sæll Billi, ég man einmitt að það var lægra í Fréttablaðinu, en síðan er spurning hvort þörf er á að setja í bæði blöðin. Þetta er einhvernvegin að festast í sessi og ég sé að það er alltaf að aukast í Fréttablaðinu dánartilkynningar.  Dánartilkynningar í útvarpi, fróðlegt að vita hvort þar hefur dregist saman í lestri andlátsfrétta. Frekar orðið eldra fólk sem hlustar á þennan lið í útvarpi. 

[Billi bilaði, 25.7.2008 kl. 01:14]

Sæl.

Ég ætlaði aðallega að hafa þetta í Mogganum, af því að maður er svo vanur að sjá þetta þar. En svo bentu ættingjar mér á að setja í Fréttablaðið líka, og því gerði ég það.  Ég setti í útvarpið líka, en ekki heyrði ég það nú, enda "of ungur".

Kveðja,